Швейцария Миллий банки делегацияси Ўзбекистонга ташриф буюрди
Улар Марказий банкка техник кўмак кўрсатишмоқчи.
Ўзбекистон Республикаси Марказий банкида Швейцария Миллий банки халқаро ҳамкорлик бошқармаси раҳбари Аттилио Занетти бошчилигидаги делегация вакиллари билан учрашув бўлиб ўтди. Бу ҳақда МБ расмий телеграм саҳифасида хабар қилинди.
Маълум қилинишича, мулоқот давомида глобал миқёсдаги рискларни инобатга олган ҳолда мамлакатдаги жорий макроиқтисодий ҳолат ҳамда прогнозлар муҳокама қилинган. Шунингдек, макроиқтисодий моделлаштириш ва прогнозлаш жараёнларини такомиллаштириш борасида қўшма ҳамкорликка оид долзарб масалалар кўриб чиқилган.
Шу билан бирга, Швейцария Миллий банки вакиллари молиявий барқарорлик йўналишида Ўзбекистон Республикаси Марказий банкига техник кўмак кўрсатишга тайёрлигини билдирган.
Аввалроқ Гулнора Каримованинг Швейцария банкида музлатиб қўйилган 70 млн долларлик пуллари қайтариб берилиши хабар қилинганди.
