Дунёдаги энг йирик ОАВ фаолияти Афғонистонда тақиқланди
“Толибон” раҳбарияти бу борада махсус буйруқ берган.
“Толибон” Афғонистонда BBC фаолиятини тақиқлаб қўйди. Бу ҳақда TOLO News хабар берди. Унга кўра, толиблар мамлакатда “BBC Pashto TV" эфирлари тақиқлаб қўйилган. TOLO News ушбу телеканал вакиллари буни тасдиқлаганини маълум қилган.
“Афғонистонда пушту, форс ва ўзбек тилидаги барча кўрсатувлар фаолияти чекловлар туфайли тўхтатилди”, – дейилади хабарда.
Маълумот ўрнида: “Толибон” ҳаракати ҳокимиятни эгаллагандан сўнг, қатор чекловлар жорий этди. Ҳозирга қадар мамлакатда қизларнинг мактабга бориши, хорижий телесериаллар намойиши, аёллар ва эркакларнинг хиёбонларга бирга бориши, шунингдек, аёлларнинг ёлғиз саёҳат қилиши тақиқлаб қўйилган. Шу билан бирга бир қанча ОАВ фаолияти чекланган.
Аввалроқ АҚШ “Толибон” билан учрашишдан бош тортганди.
