Сурхондарёда эркак ва унинг қизи уйида ўлдириб кетилди

 

Сурхондарё вилояти Шўрчи туманида 6 апрель куни эркак ва унинг қизи уйда ўлик ҳолда топилди. Вилоят Ички ишлар бошқармасининг маълум қилишича, гумонланувчи Россияда аэропортда қўлга олинди.

 

Аниқланишича, соат 18:30ларда туманнинг Яккабоғ маҳалласидаги уйда 1965 йил туғилган нафақахўр Х.Х.нинг жасади бўйин соҳасига ўткир тиғли жисм билан етказилган тан жароҳати билан топилган. Шунингдек, унинг 1992 йил туғилган қизи М.З.нинг жасади юқори нафас йўллари ва бўйин аъзоларига ўткир тиғли жисм ёрдамида етказилган тан жароҳати билан аниқланган. 

 

Ҳолат юзасидан туман прокуратураси томонидан Жиноят кодексининг 97-моддаси (Қасддан одам ўлдириш) 2-қисми бандлари билан жиноят иши қўзғатилган. Вилоят ИИБ Жиноят қидирув бошқармаси томонидан мазкур қотиллик жиноятини содир этишда гумонланган Сариосиё туманида яшовчи 1984 йилда туғилган Н.С.га нисбатан маҳаллий ва халқаро қидирув эълон қилинган.

 

Ўзбекистон ва Тожикистон Жиноят қидирув бош бошқармалари ҳамкорликда қидирув ишлари амалга оширган. Гумондор Н.С. жавобгарликдан қутулиш мақсадида Сурхондарёдан Тожикистонга ўтиб, у ердан Россияга кетган. Н.С. Москва вилоятининг Домодедово аэропортида қўлга олинган. Ҳозирда гумондорни Ўзбекистонга қайтариш чоралари кўрилмоқда.