Харобага айланган "Баҳодир Ялангтўшбий" масжиди қайта қурилади

 

Ижтимоий тармоқларда Самарқанд вилояти Оқдарё тумани «Бодоржой» МФЙ ҳудудида жойлашган «Баҳодир Ялангтўшбий масжиди» юзасидан танқидий фикр билдирилганди. Туризм ва маданий мерос вазирлиги ҳузуридаги Маданий мерос агентлиги ушбу ҳолат бўйича муносабат билдирди. 

 

Хабарга кўра, «Баҳодир Ялангтўшбий масжиди» моддий маданий мерос кўчмас мулк объекти бўлиб, Вазирлар Маҳкамасининг 2019 йил 4 октябрдаги “Моддий маданий мероснинг кўчмас мулк обектлари Миллий рўйхатини тасдиқлаш тўғрисида”ги қарори билан Миллий рўйхатга киритилган.

 

Мазкур масжид биноси ҳақиқатдан ҳам оғир аҳволда. Бироқ у ижтимоий тармоқда келтирилганидек, Баҳодир Ялангтўшбий (1578-1656 й.й.) томонидан қурдирилмаган. ХIХ–ХХ асрлар оралиғида тикланган ва Баҳодир Ялангтўшбийнинг номини абадийлаштириш мақсадида масжидга унинг номи берилган.

 

“Баҳодир Ялангтўшбий” масжиди ХХ асрнинг 20 йилларигача масжид сифатида фаолият кўрсатган. Шу даврдан эътиборан собиқ мустабид тузум томонидан диний қадриятлар топталиб, масжид фаолияти тўхтатилган ва омборхонага айлантирилган.

 

Маҳаллий нуроний оқсоқоллар томонидан оғзаки маълумот берилишича, Қатағон йиллари (1932-1938 й.й.)да масжид биноси ёниб кетган. Шундан сўнг объект ўз ҳолига ташлаб қўйилган. Бугунги кунда объектнинг сақланиши авария ҳолатига келиб қолган.

 

Айни вақтда тарихий бинони сақлаб қолиш чора-тадбирлари кўрилмоқда. Хусусан, “Самарқанд вилоятини 2022–2026 йилларда ижтимоий-иқтисодий ривожлантириш Дастури” тасдиқланган бўлиб, Дастурнинг 2023 йилга мўлжалланган қисмида “Баҳодир Ялангтўшбий масжиди”ни реставрация қилиш ҳамда Баҳодир Ялангтўшбий шахси ҳақида кино олиш белгиланган.

 

Самарқанд маданий мерос бошқармаси томонидан “Баҳодир Ялангтўшбий” масжидини реставрация қилиш юзасидан лойиҳа-таклифи ишлаб чиқилиб, Маданий мерос агентлиги Илмий-эксперт Кенгашига тақдим этилди.

 

Келажакда масжид биносидан туризм объекти сифатида фойдаланиш режалаштирилган.