Америкалик тадбиркор UEFА президентини судга берди
Президент Шимолий Америкадаги кўргазмали ўйинга рухсат бермаган.
Америкалик тадбиркор Чарли Стиллитано UEFА президенти Александр Чеферин устидан Шимолий Америкадаги Реал, Барселона ва Ювентус клубларининг кўргазмали ўйинлари тўхтатилгани учун судга мурожаат қилди. Бу ҳақда “Marca” нашри хабар берди.
Манбага кўра, Чеферин Стиллитанонинг Суперлигада иштирок этиб, UEFАни йўқ қилишга уринаётган жамоалар билан ҳамкорлик қилишига қарши эканини айтган. Стиллитанонинг адвокатлари Чефериннинг хабарини таҳдидли деб таърифлаган.
Эслатиб ўтамиз, 12 та жамоа иштирокидаги Суперлига 19 апрель куни ташкил этилган бўлса-да, орадан икки кун ўтиб 9 та клуб мусобақани тарк этишини маълум қилганди.
7 май куни UEFА Суперлиганинг собиқ иштирокчиларига қандай жазо тайинлаш борасида қарор қабул қилди. Тўққизта клубнинг ҳар бири Европа бўйлаб футбол ривожи учун 15 миллион евродан хайрия тўлаши маълум бўлди. Клублар, шунингдек, бир мавсумда UEFА мусобақаларида қатнашганликлари учун даромаднинг 5 фоизини товон сифатида қайтаришга ваъда беришган.
Аввалроқ, UEFА Англияни жазоламоқчи эканлиги ҳақида хабар берилганди.
Жамшидбек Амиров
