Афғонистон аҳолисининг 55 фоизи очликдан азият чекяпти
Бу ҳақда Россия хавфсизлик кенгаши котиби маълумот берди.
Афғонистон аҳолисининг ҳар иккинчиси очликдан азият чекмоқда. Бу ҳақда РФ хавфсизлик кенгаши котиби Николай Патрушев маълум қилди.
У бу ҳақда Душанбеда ташкил этилган афғон масаласи бўйича кўп томонлама маслаҳатлашувларнинг навбатдаги раундида айтган.
“Яқин вақт ичида Афғонистонда озиқ-овқат танқислиги муаммоси янада кескинлашиши мумкин. мавжуд маълумотларга кўра, 40 миллион аҳолининг 95 фоизи озиқ-овқат етишмовчилигини ҳис қилмоқда, 55 фоиз аҳоли эса очликдан азият чекмоқда”, – деган Патрушев.
Унинг қўшимча қилишича, бу ҳолат ортидан миграцион вазият ҳам оғирлашиши мумкин. БМТ маълумотларига кўра, 2021 йилда афғон қочоқлари сони 2.6 миллионни ташкил этди.
“Агар Афғонистонда вазият ёмонлашишда давом этса, бу рақам кўп мартага ошади. Шу билан бирга мигрантлар нафақат Эрон ва Покистонга, балки Марказий Осиё давлатлари томон ҳам ҳаракатланиши мумкин”, – деб қайд этган сиёсатчи.
Бундан ташқари, ҳозирда афғон заминида 20 дан ортиқ террорчи гуруҳлар фаолият юритаётганига эътибор қаратилган. РФ хавфсизлик кенгаши котибининг сўзларига кўра, масалан, “Ал-Қоида” террорчилари сони кўпайиб бормоқда ва улар минг кишини ташкил этмоқда.
Аввалроқ Ўзбекистон ташқи ишлар вазири АҚШнинг Афғонистон бўйича махсус вакили билан учрашгани хабар қилинганди.
