Хоразмда 8 нафар шахс «Cobalt» ҳайдовчисини пичоқлаб кетди
Ҳодиса оқибатида ҳайдовчи воқеа жойида вафот этган.
Ижтимоий тармоқларда Урганчда 8 нафар шахс «Cobalt» ҳайдовчисини пичоқлаб кетгани ва жабрланувчи воқеа жойида вафот этгани акс этган видеоёзув тарқалди.
Ушбу ҳолат юзасидан Бош прокуратура дастлабки маълумотларни эълон қилди.
Унга кўра, видеоёзувда акс этган ҳолат бўйича 2 июнь куни жиноят иши қўзғатилиб, ҳозирда Хоразм вилояти прокуратураси томонидан тергов ҳаракатлари олиб борилаётгани айтилган.
Жиноят иши доирасида 1 нафар шахсга Жиноят кодексининг 97-моддаси (Қасддан одам ўлдириш) билан айб эълон қилиниб, процессуал тартибда қўлга олинган.
Қолган 7 нафар шахсга Жиноят кодексининг 277-моддаси (Безорилик) билан айб эълон қилиниб, 1 нафарига «қамоққа олиш» ва 6 нафарига эса «муносиб хулқ-атворда бўлиш тўғрисида тилхат» эҳтиёт чоралари қўлланилган.
Ҳозирда тергов ҳаракатлари давом этмоқда.
