Тошкентда ноқонуний диний таълим берганлар ушланди
Улар 15 нафар болага жисмоний тазйиқ ҳам ўтказган.
Хусусий уйлардан бирида яшовчи 37 ёшли О.А. ҳамда унинг турмуш ўртоғи 35 ёшли М.A. рухсатсиз 15 нафар вояга етмаган болаларга диний адабиётлардан фойдаланган ҳолда дарс ўтишган. Бу Тошкент шаҳар Ички ишлар бош бошқармаси ва ДХХ ходимлари томонидан Сергели туманида ўтказилган профилактик тадбирлар давомида маълум бўлди. Воқеа жойидан топилган диний адабиётлар ва мобил телефонлар ашёвий далил сифатида олинган.
Болаларга мунтазам равишда психологик ва жисмоний тазйиқ ўтказилгани айтилмоқда. Уларга нисбатан жисмоний куч ишлатилган.
Ушбу шахсларга нисбатан Ўзбекистон Республикаси МЖтКнинг 241-моддасига (Диний таълимотдан сабоқ бериш тартибини бузиш) асосан тегишли ҳужжатлар расмийлаштирилган.
Ҳолат юзасидан ИИО ходимлари томонидан терговга қадар текширув олиб борилмоқда. Вояга этмаган болаларга етказилган тан жароҳатларининг оғирлигини аниқлаш мақсадида суд-тиббий экспертизаси тайинланди. Текширув натижаларига кўра қонуний қарор қабул қилинади.
Ҳозирда болалар Тошкент шаҳар ИИББнинг Вояга етмаганларга ижтимоий-ҳуқуқий ёрдам кўрсатиш марказига жойлаштирилиб, уларга психологик ва тиббий ёрдам кўрсатиш ишлари олиб борилмоқда.
