Самарқандда ғалла ортилган автомашина ёниб кетди
Ҳолат юзасидан вилоят ФВБ маълумот берди.
Бугун, 24 июнь куни Самарқанд вилоятининг Иштихон туманида ғалла ортилган юк автомашинасида ёнғин содир бўлди. Бу ҳақда вилоят Фавқулодда вазиятлар бошқармаси Матбуот хизмати хабар берди.
Соат 15:18 да Иштихон тумани ҳудудидан ўтувчи М-37 автомобил йўлининг 52-километрида “Газ-52” русумли транспорт воситасида ёнғин содир бўлаётганлиги тўғрисида туман ФВ бўлимига хабар келиб тушган.
Воқеа жойига 2 та ёнғин-қутқарув экипажи жалб этилган ва соат 15:32 да ёнғин тўлиқ бартараф этилган.
Ҳодиса оқибатида автомашина олди қисман ёниб зарарланган. Шунингдек, унинг юкхонасида бўлган тахминан 3 тонна ғалла ёнғиндан сақлаб қолинган. Ҳозирда терговга қадар текшириш ишлари олиб борилмоқда.
Эслатиб ўтамиз, бундан олдин Жиззах вилоятининг Шароф Рашидов туманида автомашина газ баллони портлаб кетганди.
