EPS-Topik тест имтиҳонига махсус восита олиб кирмоқчи бўлган шахс ушланди
Имтиҳон қоидаларини бузган фуқаро қонунчиликда белгиланган жавобгарликка тортилиши айтилмоқда.
Ташқи меҳнат миграцияси агентлиги томонидан Корея Республикасида ишлаш истагидаги фуқаролар учун Тошкент шаҳрида EPS-Topik тест имтиҳонлари ўтказилаётган эди. Агентлик бошқа фуқаро ўрнига тестга кириш ва тестда қўшимча воситалардан фойдаланишга уриниш ҳолатлари қайд этилаётгани ва бунинг оқибатлари ҳақида огоҳлантирган.
Рўйхатдан ўтган фуқаро Ф.А. махсус воситани тестга олиб киришга уринганида Бандлик ва меҳнат муносабатлари вазирлиги ва Ташқи меҳнат миграцияси агентлиги ходимлари томонидан ушлаб қолинди.
Ушбу ҳолат баёнлаштирилиб, тегишли ташкилотларга тақдим этилди.
“Тест имтиҳони қоидаларини бузган фуқаро 3 йил давомида ушбу имтиҳонда қатнашиш имкониятидан маҳрум бўлиши ҳамда қонунчиликда белгиланган жавобгарликка тортилиши мумкинлиги ҳақида яна бир бор огоҳлантирамиз.
Имтиҳон жараёнида барча тартиб-қоидаларга риоя қилишга чақирамиз”, - дейилади агентлик хабарида.
