Тошкентда 2 та автомашина пиёдани уриб, босиб кетди
Оқибатда фуқаро воқеа жойида вафот этган.
Тошкент шаҳрининг Яккасарой туманида пиёда автомашина уриб, босиб кетиши кетиши оқибатида ҳалок бўлди. Бу ҳақда шаҳар ИИБ ахборот хизмати хабар бермоқда.
Маълум қилинишича, 5 июль куни соат тахминан 00:05 ларда Яккасарой тумани Шота Руставели кўчасида ҳайдовчи 1979 йилда туғилган З. Ю. “Hyundai Santa Fe” русумли (давлат рақам белгиси 01 М 014070) бўлган автомашинада ҳаракатланиб, белгиланмаган жойдан йўлни кесиб ўтаётган пиёдани уриб юборган. Зарба оқибатида пиёда йиқилган ва бир йўналишда ҳаракатланиб келаётган, ҳайдовчи 1983 йилда туғилган М. Х. бошқарувидаги “Toyota” русумли автомашина тагида қолиб кетган.
1980 йилда туғилган В .С. олган тан жараҳатлари натижасида воқеа жойида вафот этган.
Мазкур ҳолат юзасидан Тошкент шаҳар ИИББ Тергов бошқармаси томонидан Ўзбекистон Республикаси Жиноят кодексининг 266-моддаси 2-қисмида назарда тутилган жиноят аломатлари билан жиноят иши қўзғатилди. Ҳозирда тергов ҳаракатлари олиб борилмоқда.
