Фарғонада кўкнори сомонини сақлаган аёл ушланди
Ҳолат юзасидан тергов ҳаракатлари олиб борилмоқда.
Жорий йилнинг 4 июль куни Фарғона вилояти Қўқон шаҳар ИИБ ЖҚБ ходимлари томонидан ўтказилган тезкор тадбир давомида Меҳнатобод маҳалла ҳудудида яшовчи М.С. исмли аёлнинг яшаш хонадони холислар иштирокида кўздан кечирилганда, том қисмида кўкнори сомонини сақлаб келаётганлиги аниқланган ва далилий ашё тариқасида олинган.
Мазкур ҳолат юзасидан Қўқон шаҳар ИИБ ҳузуридаги тергов бўлими томонидан жиноят кодексининг 276-модда 2-қисми “а” банди билан жиноят иши қўзғатилиб, ҳозирда тергов ҳаракатлари олиб борилмоқда.
“Ҳурматли фуқаролар! Гиёҳвандлик моддаларини истеъмол қилиш соғлиғингиз учун хавфли эканлигини, уни сақлаш қонунга хилофлиги ва жиноий жавобгарликка сабаб бўлишини эсдан чиқарманг”, – дейилади вилоят ИИБ хабарида.
Маълумот ўрнида, Жиноят кодексининг 276-моддаси 2-қисмида кўрсатилган жиноятни содир этган шахс 5 йилгача озодликдан маҳрум қилиш билан жазоланиши мумкин.
