Хоразмда 5 ёшли бола боғчада вафот этди
Ҳолат юзасидан вилоят МТБ маълумот берди.
Хоразм вилоятининг Хонқа туманидаги боғчада 5 ёшли бола вафот этди. Ҳолат юзасидан вилоят мактабгача таълим бошқармаси ахборот хизмати маълумот берди.
Ҳодиса Хонқа тумани “Тома” маҳалласида жойлашган 24-сонли давлат мактабгача таълим ташкилотида рўй берган. Муассасада тушликдан сўнг 5 ёшли тарбияланувчи Ў. Ш. А.нинг тоби қочган ва зудлик билан тез ёрдам чақирилган.
Маълум қилинишича, шундан сўнг бола вафот этган.
“Бу бўйича суд-тиббий экспертизасининг хулосасига кўра, шунингдек, ҳуқуқни муҳофаза қулувчи ташкилотлар томонидан якуний хулоса берилгач, Мактабгача таълим вазирлиги ахборот хизмати томонидан тўлиқ баёнот берилади”, — дейилади хабарда.
Эслатиб ўтамиз, Наманган вилоятининг Чуст туманидаги боғчада 1 август куни 5 ёшли бола тилини чайнаб юбориб, вафот этганди. Шундан сўнг Мактабгача таълим вазирлиги ҳолат бўйича тергов ишлари ўтказилаётганини билдирган.
Жавоҳирбек ТУРСУНОВ
