Тайвань мудофаа вазирлиги амалдори жонсиз ҳолатда топилди
Ҳодиса Хитой билан муносабатлар кескинлашган бир пайтда содир бўлган.
Тайвань мудофаа вазирлиги тадқиқотлар ва ихтиролар бўлими ходими меҳмонхонада ўлик ҳолда топилди. Бу ҳақда Reuters хабар берди.
Агентлик хабарига кўра, 6 август куни тонгда, Тайвань жанубидаги меҳмонхоналардан бирида Чун Шань фан ва технологиялар миллий институти раҳбари ўринбосари Оу Ян Ли-син жасади топилган. Ҳокимият унинг ўлими сабабларини аниқлаштирмоқда.
Оу Ян жанубдаги Пиндун округида хизмат сафарида бўлган. У 2022 йилда лавозимига тайинланган, ракеталар ишлаб чиқариш лойиҳасини назорат қилган.
Чун Шань фан ва технологиялар миллий институти ракеталар ишлаб чиқариш қувватини ошириш билан шуғулланган. Reuters маълумотларига кўра, 2022 йилда уларнинг сони 500га етди.
Маълумот ўрнида: 2 августда АҚШ Конгресси вакиллар палатаси спикери Нэнси Пэлоси Тайванга ташриф буюрди. Шундан кейин Хитой орол атрофида йирик ҳарбий машғулотлар бошлашини эълон қилди. Ҳозирда Тайвань атрофидаги олти нуқтада ўқув машқлари бўлиб ўтмоқда.
