Шавкат Мирзиёев Германия Президенти билан телефонлашди

 

Бугун, 29 август куи Ўзбекистон Республикаси Президенти Шавкат Мирзиёев Германия Федератив Республикаси Президенти Франк-Вальтер Штайнмайер билан телефон орқали мулоқот қилди. Бу ҳақда Президент матбуот хизмати хабар бермоқда.

 

Суҳбатда кўп қиррали Ўзбекистон-Германия ҳамкорлигини янада ривожлантириш ҳамда минтақавий шерикликнинг долзарб масалалари кўриб чиқилган.

 

Германия Президенти давлат раҳбари ва кўп миллатли ўзбек халқини мамлакат мустақиллигининг 31 йиллиги билан самимий қутлади. Кейинги йилларда амалга оширилаётган ислоҳотлар дастурининг натижалари алоҳида қайд этилди, Янги Ўзбекистонда амалга оширилаётган демократик ва иқтисодий янгиланишлар қўллаб-қувватланди.

 

Етакчилар олий даражадаги келишувларни амалга ошириш натижасида икки томонлама муносабатларда юксак даражага эришилганини мамнуният билан қайд этди.

 

Жорий йил бошида ўзаро товар айирбошлаш 60 фоизга ўсди. Ўзбекистонда Германиянинг 200 дан зиёд етакчи компаниялари муваффақиятли фаолият юритмоқда. Ўтган ойда “Knauf”, “Papenburg” ва “Falk Porsche” каби таниқли корхоналар Ўзбекистонда ўзларининг янги заводларини ишга туширди.

 

Шу йилнинг июль ойида Германия бизнесининг 100 дан ортиқ вакиллари иштирокида ўтган Ўзбекистон-Германия ишбилармонлар кенгашининг навбатдаги йиғилишидан сўнг иқтисодиётнинг юқори технологик тармоқларида 24 та янги инвестиция лойиҳаларини тайёрлаш ва амалга ошириш бошланди.

 

Ўзаро манфаатли молиявий-техник ва маданий гуманитар ҳамкорлик кенгайиб бормоқда. Ўзбекистонда Гёте институти, Конрад Аденауэр ва Фридрих Эберт фондлари, Германиянинг бошқа ташкилотлари фаол иш олиб бормоқда.

 

Ўзбекистон ва Германия Президентлари амалий ҳамкорликнинг кенгайиши, шунингдек, узоқ муддатли шерикликни ривожлантиришга қаратилган қўшма дастур ва лойиҳаларнинг илгари сурилишини қўллаб-қувватлади.

 

Минтақавий ҳамкорлик, шу жумладан, Европа Иттифоқи доирасидаги конструктив мулоқотни ривожлантириш масалаларига алоҳида эътибор қаратилди. Афғонистонда узоқ муддатли тинчликни таъминлаш ва унинг ижтимоий-иқтисодий тикланишига кўмаклашиш мақсадида фаол ҳамкорликни давом эттириш муҳим экани таъкидланди.

 

Ўзбекистон ва Германия Президентларининг телефон орқали мулоқоти ҳар доимгидек самимий, очиқ ва дўстона руҳда ўтди.