Қашқадарёда фуқаро ЙПХ инспекторини уриб, ҳақоратлади

 

Ижтимоий тармоқларда Қашқадарё вилоятининг Яккабоғ туманида ЙПХ ходими ва фуқаро ўртасида тортишув акс этган видео тарқалди. Ҳолат юзасидан Ички ишлар вазирлиги матбуот котиби Шоҳруҳ Ғиёсовнинг расмий муносабат билдирди. 

 

Воқеа 21 сентябрь куни соат 15:40 ларда Қашқадарё вилояти ҳудудидан ўтувчи 4R Яккабоғ–Чироқчи–Кўкдала–Шўрбозор автомобиль йўлининг 66-километрида содир бўлган. 

 

Чироқчи тумани ИИБ ЙПХ инспектори А.Раҳматов текшириш учун Нексия русумли транспорт воситасини тўхтатганда ундаги йўловчи – 1991 йилда туғилган фуқаро Ш.М. маст ҳолатда ходимнинг қонуний ҳаракатларига халақит бериб, уни ҳақорат қилган. Ходим жамоат тартибини бузилишини олдини олиш учун рация орқали ёрдамчи наряд чақиртирганида Ш.М. воқеа жойидан яширинмоқчи бўлган.

 

Видеода ходим ҳуқуқбузарни воқеа жойидан қочиб кетишини олдини олиб, унга нисбатан жисмоний куч ишлатаётган ҳолати тасвирланган.

 

Ҳозирда ҳолат юзасидан Ўзбекистон Республикаси ЖКнинг 219-моддаси билан жиноят иши қўзғатилиб, ҳуқуқбузар процессуал тартибда қамоққа олинган.

 

“ЙПХ инспектори А.Раҳматовнинг ўз вазифасини босиқлик билан, провокацияларга учмаган ҳолда бажарганлиги, ёрдамчи кучлар етиб келгунга қадар вазиятни издан чиқишига ва ҳуқуқбузарни яширинишига йўл қўймаганлиги учун навбатдан ташқари рағбатлантириш масаласи кўрилмоқда”, — дейилади хабарда.