Симёғочда расмга тушмоқчи бўлган ўсмирни ток урди
Боланинг соғлиги ҳақида маълумот берилди.
Наманганда симёғочга чиқиб, расмга тушмоқчи бўлган 9-синф ўқувчисини 27,5 минг вольтли ток урди. Бу ҳақда Наманган вилояти ИИБ ахборот хизмати хабар берди.
Воқеа 19 сентябрь куни соат 19:05 да Тўрақўрғон—Роустон темирйўл бекатлари оралиғининг 81-километрида содир бўлган.
Жабрланувчи йигит туман тез тиббий ёрдам бўлимига ётқизилган. Унга кўрсатилган ёрдамдан сўнг, ҳозирда беморнинг ҳолати барқарор экани айтилмоқда.
Аниқланишича, ўқувчи ижтимоий тармоқлардаги обуначилари сонини ошириш ва машҳурликка эришиш мақсадида поезд йўлига ўрнатилган электр симёғочига чиқиб, суратга тушмоқчи бўлган.
Ҳолат юзасидан Наманган вилояти ИИБ Транспортда хавфсизликни таъминлаш бошқармаси масъуллари томонидан бола таҳсил оладиган 25-сонли мактабда муҳокама йиғилиши ўтказилган.
