Расул Кушербаев Экология қўмитасидан норози

 

Кушербаев Экология қўмитаси раиси ўринбосари бўлган Исломбек Боқижоновнинг йўналиши чиқиндиларни тартибга солиш бўлса-да, ўтган даврда улар билан дарахт кесишга қарши масалаларда кўп ишлагани, куни кеча эса улар бесабаб ишдан олинганини таъкидлаган. 

 

«Уларнинг ишдан кетишига сабаб ҳақида кўпчилик қатори мендаги тахмин ҳам айнан дарахткушлик воқеаларига боғланмоқда.

Мен Экоқўмитада табиатни севадиган одам ишлаши керак, деб ҳисоблайман ва Исломбек ака шундайлардан.

Охирги учрашувимизда чиқиндиларни бошқаришда давлат хусусий шерикликда ишлаш учун 50 дан ортиқ битимларни имзоланишига эришишганини айтганди. Инвестиция суммаси 1 триллион атрофида экан.

Тўғри, олдинда муаммолар кўп, бироқ бу енг шимариб ишлашнинг бошланиши эди.

Шунингдек, яқинда Чилонзор ва Учтепа туманларидаги дарахткушликда ҳам Исломбек ака жонбозлик кўрсатиб, қанча босим ва қийинчилик бўлмасин, фаолларни ёнида турганди. Ўшанда қўмитадан бошқа ҳеч ким келмаган.

Афсуски, кўпчилик айнан қийин, қалтис вазиятларда дарахт кесаётганларга қарши курашда негадир панада турарди, Исломбек ака эса аксинча ёнимизда бўлган.

Назаримда дарахткушликка қарши курашаётган, табиатни сақлаб қолиш йўлида ҳаракат қилаётганлар ҳақида раҳбариятга нохолис маълумотлар киритилмоқда. Ва бу иш бошида дарахт кесилишидан манфаатдор томонлар бўлиши мумкин.

Агар шундай бўлса ҳолимизга вой ўртоқлар: ҳақиқий «яшил макон»ни тушимизда кўрамиз», — деб ёзган депутат.

 

Эслатиб ўтамиз, жорий йилнинг 7 сентябрь куни Тошкент шаҳри Чилонзор тумани ҳудудида қурилиш ташкилоти томонидан 58 туп дарахтни кесиб ташлагани жамоатчилик фаолларининг норозиликларига сабаб бўлганди. Орадан нақд уч кун ўтиб Бош прокуратура "тилга кирган". Ташкилот муносабатига кўра, қурилиш ташкилоти раҳбарининг кесилган дарахтлар учун қарийб 800 миллион сўм бадал пули тўлаб берганини маълум қилган.

 

Кушербаев эса «дарахткесарлик»нинг айбдори фақат қурилиш ташкилоти раҳбари бўлмагани, балки туман ҳокими ва прокурорига ҳам тегишли чора кўриш зарурлигини таъкидлаган.