«Қамчин» педагогикаси энди Самарқандда

 

Маълумотларга кўра, жорий йил 12 октябрь куни тумандаги 4-сонли мактабнинг 11-синф ўқувчилари рус тили дарсида бўлган. Калтак еган боланинг айтишича, устози уни телефонда гаплашишига қаршилик кўрсатиб, урган.

 

"Коридордан ташқарига чиқаётгандим, аям қўнғироқ қилди. Аямнинг мазалари йўқ эди, гўшакни кўтарай десам, ъйўқ, кўтармайсанʼ, деб, ичкарига киргизиб, коридорда судраб, ҳақорат қилиб, урди", — дейди йигит.

 

"Дарс бошланганига 20 дақиқа бўляпти, ўқувчи залда юрибди. Дарсга кир, дедим, қўлидаги телефонни бир-икки марта ушлаб огоҳлантирдим, психолог инспекторга айтиб берганман, директор номига билдириш берганман. Ота-оналарининг ҳам хабари бор эди. Қўрқмасдан гап қайтаряпти, иккинчи қаватга чиқмайман, деб қочмоқчи бўлди. Қўлидан ушлаб, синфхонага чақирдим, синфхонага яқинлашганда мени силтаб ташлади. Сенсираб, сўкишга тушди. Стресс ҳолатдаман, беш ойлик ҳомиладорман. Ўқувчига жаҳл билан бир-икки тарсаки солдим, кучли асабийлашдим", — дейди ўқитувчи.

 

Мактаб маъмуриятининг таъкидлашича, ҳолат юзасидан йиғилиш ўтказилган, ўқитувчи ўз аризасига кўра ишдан бўшаб кетган. Ҳолат ички ишлар ходимлари томонидан назоратга олинган.