Германия ТИВ раҳбари Ўзбекистонга келади
Анналена Бербок ташриф давомида икки давлат ҳамкорлигида ташкил этилган марказларга боришни ҳам мақсад қилган.
Германия ТИВ матбуот котиби хабар беришича, мамлакат ташқи ишлар вазири Анналена Бербок 30 октябрь куни Ўзбекистон ва Қозоғистонга ташриф буюради.
Бербок Остонада ўз ҳамкасби Мухтор Тлеуберди билан музокаралар ўтказишни режалаштирган. Шунингдек, вазир Тошкентда мамлакат ташқи ишлар вазири Владимир Норов билан музокаралар ўтказиш ҳамда Германия-Ўзбекистон таълим марказига ташриф буюришни мақсад қилган. Кейинги манзил Самарқанд шаҳри бўлиб, унда Бербок Германия кўмагида қурилаётган ирригация тизимларини бориб кўради.
Вазирга энергетика ва инфратузилма соҳаси мутахассислари делегацияси ҳамроҳлик қилади, дея хабар берди Германия ТИВ.
Бербок Марказий Осиё республикаларига ташрифидан сўнг Германиянинг Мюнстер шаҳрида бўлиб ўтадиган "Катта еттилик" мамлакатлари ташқи ишлар вазирлари саммитига боради. Унда Россиянинг Украинага бостириб кириши, Хитой ва Эрон билан муносабатлари муҳокама мавзусига айланиши айтилмоқда. Хусусан, Марказий Осиё ва Африка давлатлари билан алоқаларни ривожлантириш масалалари ҳам кун тартибида кўриб чиқилади. Саммитда Африка ташқи ишлар вазирлари ва Африка иттифоқи вакиллари иштирок этиши кутилмоқда.
