Яна дарахткушлик: пойтахтда қимматбаҳо дарахтлар кесиб ташланди

 

Президент Шавкат Мирзиёев раислигида 11 октябрь куни маҳаллаларни обод қилиш ва аҳолини ўйлантираётган масалаларни ҳал этиш бўйича ўтказилган видеоселектор йиғилишида ҳудудларни кўкаламзорлаштириш масаласига ҳам алоҳида эътибор қаратилганди. 

 

Давлат раҳбари «Яшил макон» умуммиллий лойиҳаси доирасида бу йил якунигача 75 миллион дона, келгуси йил баҳор ойларида яна 125 миллион дона мевали ва манзарали кўчатлар экиш вазифасини қўйди. Ўтган йилги тажрибадан келиб чиқиб, 20 октябрдан 1 декабргача кўчат экиш бўйича «долзарб 40 кунлик»ни эълон қилди.

 

Шавкат Мирзиёев дарахт ҳавас билан экилиши, халқимиз, маҳаллаларимизнинг маданиятига айланиши лозимлигини таъкидлаганди. Бу бўйича вилоят ҳокимларига ҳам алоҳида топшириқ берилган. ОАВ орқали ҳам бу мавзу танқидий-таҳлилий муҳокама ҳам этилмоқда. Бироқ биз минг бонг урмайлик вазият ўша-ўша. Ҳатто президент топшириғини ҳам писанд қилмайдиган ботир мутасаддилар топилмоқда. Таажжублиси, «долзарб 40 кунлик»да дарахткушлик тадбирлари шиддатли давом этмоқда.

 

Хусусан, пойтахтда қурилиш бўлаётган жойда 16 туп турли қимматбаҳо дарахтлар кесиб ташланди.

 

Экология қўмитаси Матбуот хизматининг хабарига кўра, Тошкент шаҳрининг Яшнобод туманидаги «Илтифот» маҳалласи ҳудудидаги қурилиш объекти ҳудуди кўздан кечирилганда 16 туп турли қимматбаҳо бўлган дарахтларнинг ноқонуний равишда таг қисмидан кесиб ташланганлиги аниқланди. 

 

«Ушбу ҳолат бўйича "Ўсимлик дунёсини муҳофаза қилиш ва ундан фойдаланиш тўғрисида”ги қонуннинг 37-моддаси талаблари бузилиб, ўсимлик дунёсига кўп миқдорда зарар етказилгани маълум бўлди.Ўрганиш натижаси бўйича тўпланган материаллар тегишли тартибда расмийлаштирилиб, туман прокуратурасига тақдим этилди», — дейилади хабарда.