"Танишайлик, мен Чаросман"
Теlegram’да қиз бола номидан саҳифа очиб товламачилик қилган йигит ушланди.
Киберхавфсизлик марказининг хабар беришича, Сирдарё вилоят ИИБга 2002 йилда туғилган фуқаро О.Ш. ариза билан мурожаат қилиб, ўзига нисбатан товламачилик қилаётган қизга чора кўришни сўраган. Бу ҳақда Киберхавфсизлик маркази хабар қилди.
Маълум бўлишича, О.Ш.Теlegram’даги танишув гуруҳларида "Чарос" исмли қиз билан танишиб, кейинчалик у билан дугона бўлган. "Чарос"га бошқалар кўриши мумкин бўлмаган фотосуратларини жўнатган. Шундан сўнг "Чарос" у юборган расмларини ижтимоий тармоқларда тарқатиш билан қўрқитиб, фуқародан 15 миллион сўм беришни талаб қилган.
Олиб борилган тезкор-қидирув тадбирлари натижасида ўзини "Чарос" деб таништирган фойдаланувчи аслида йигит бўлиб, у муқаддам Жиноят кодексининг 166-модда 2-қисми билан судланган, Сирдарё туманида яшовчи, 1995 йилда туғилган Т.Б. экани аниқланган. Қайд этилишича, Т.Б.га нисбатан Жиноят кодексининг 165-модда 2-қисми билан жиноят иши қўзғатилиб, тергов ҳаракатлари олиб борилмоқда.
