Ўзбекистонлик депутатлар Германия Бундестаги фаолияти билан танишмоқда
Айни кунларда Парламент аъзолари амалий ташриф билан мамлакатда бўлиб турибди.
Ўзбекистон Республикаси Олий Мажлиси Қонунчилик палатаси депутатлари ва Девон ходимлари ҳамда Қонунчилик муаммолари ва парламент тадқиқотлари институти вакилларидан иборат делегация амалий ташриф билан Германияга борди.
Ташриф доирасида Ўзбекистон парламенти аъзолари Германия Бундестаги фаолиятини ташкил этиш тажрибаси, жумладан, унинг бошқаруви, илмий хизмати, доимий комиссиялари, парламент назорати ва мурожаатлар органлари, кутубхоналар ва бошқа тузилмалари фаолияти билан яқиндан танишади.
Шунингдек, партия фракциялари, ихтисослаштирилган қўмиталар фаолияти, Бундестаг ва сайлов округларидаги ялпи мажлислар жараёни билан танишиши режалаштирилган.
Таъкидланишича, сўнгги беш йилда парламент делегацияларининг 10 дан ортиқ ташрифлари амалга оширилган. Германия парламенти аъзолари Ўзбекистонда амалга оширилаётган сиёсий-ҳуқуқий ислоҳотлар билан боғлиқ долзарб масалаларга бағишланган турли анжуман, форум ва бошқа тадбирларда мунтазам иштирок этиб келмоқда.
Ўзбекистон Республикаси Олий Мажлисининг Германия Бундестаги билан ҳамкорлик бўйича парламентлараро гуруҳи ва Бундестагнинг “Германия – Марказий Осиё” Парламент гуруҳи икки томонлама ҳамкорликни ривожлантиришга катта ҳисса қўшмоқда.
