Евроиттифоқ Украинани зулматда қолдирмоқчи эмас
Украинага 30 млнга яқин LED лампалари ва генераторлар юборилади.
Европа Украина учун 30 миллионга яқин ёруғлик диодли лампалар (LED) сотиб олиш учун маблағ ажратади. Бу ҳақда Еврокомиссия президенти Урсула фон дер Ляен айтиб ўтди.
“Биз ҳаммамиз Президент Зеленскийни диққат билан тингладик, у Украина уйлари учун 50 миллион LED лампалар тақдим этиш учун халқаро ҳамжамиятга мурожаат қилди. Бу муҳим, чунки улар эски лампочкаларга қараганда 88 фоизга тежамкор. Бу фавқулодда энергия тежаш. 50 миллион LED лампалар ўрнатилса, улар 1 ГВтгача электр энергиясини тежайди, бу битта атом электр станциясининг йиллик ишлашига тенгдир”, — деди у.
Фон дер Ляен бошқа мамлакатларни бундай лампаларни сотиб олишни молиялаштиришга қўшилишга чақирди. Унинг сўзларига кўра, ЕК аллақачон Донецк, Запорожье, Днепропетровск, Николаев вилоятларидаги шифохоналарда доимий электр таъминотини таъминлаш учун 14 та йирик генераторни тақдим этган. Булар электр энергиясига муҳтож касалхоналардир.
Бундан ташқари, яна 800 та генератор мамлакатнинг бошқа ҳудудларига юборилади.
Польшада шу ҳафта иш бошлайдиган энергетика товарлари маркази яратилмоқда. Бу омборлар тармоғи бўлиб, у ерда товарлар йиғилиб, тезда Украинага жўнатилади.
Эслатиб ўтамиз, Парижда Украина халқи билан бирдамлик ёки энергетика “Рамштeйн” халқаро конференцияси бўлиб ўтмоқда. Бу шундай форматдаги биринчи учрашувдир. Иттифоқчи давлатларнинг Украинага ҳарбий ёрдам кўрсатиш бўйича учрашувлари “Рамштейн” деб номланади.
