Сурия ва Туркия ярашишга яқинми?
Москвада икки давлат мудофаа вазирлари учрашди. Бу сўнгги 11 йилда шундай форматда ташкил этилган илк учрашув.
Москвада Россия, Туркия ва Сурия мудофаа вазирларининг уч томонлама учрашуви бўлиб ўтди. Эътиборлиси, бу Сурия ва Туркия ҳарбий раҳбариятининг 2011 йилдан буён илк учрашуви бўлди.
Турк томонидан мудофаа вазири Хулуси Акар ва миллий разведка ташкилоти раҳбари Хакан Фидан, Сурия томонидан мудофаа вазири Али Маҳмуд Аббос иштирок этган. Россия делегациясига Сергей Шойгу бошчилик қилган.
РФ мудофаа вазирлиги маълумотларига кўра, учрашувда Сурия инқирозини ҳал қилиш учун умумий ечимлар муҳокама қилинган. Шунингдек, террорчи гуруҳларга қарши кураш масаласи ҳам кўриб чиқилган.
Сурияда 12 йилдан буён фуқаролар уруши давом этмоқда. РФ амалдаги президент Башар Асадни қўллаб-қувватласа, Анқара Асадга мухолифатда бўлган гуруҳларга кўмак бериб келади.
Сўнгги вақтларда Туркия ва Сурия етакчилари учрашуви ҳақида кўплаб хабарлар тарқалди. Москва икки президент учрашувида воситачи бўлишга тайёрлигини билдирган.
