Песков Шольц ва Макрон Путинга қўнғироқ қилмай қўйганидан нолиди
РФ Президентининг матбуот котиби Россия ҳар қандай алоқалар учун очиқлигини маълум қилди.
Франция ва Германия етакчилари Владимир Путин билан узоқ вақтдан бери алоқага чиқмай қўйди. Бу ҳақда Россия Федерацияси Президентининг матбуот котиби Дмитрий Песков маълум қилди.
"Биз Шольц ва Макроннинг кўплаб баёнотларини эшитдик, улар вазиятдан чиқишнинг баъзи йўлларини излаш учун Путин билан мулоқотда давом этишларини айтдилар. Бироқ сўнгги пайтларда ҳеч қандай ташаббус бўлмади. Макроннинг Путинга қўнғироқ қилишга ва гаплашишга тайёрлиги ҳақидаги баёнотларини 5-6 марта эшитдик, аммо бундай суҳбат учун ҳеч қандай сўров, йўналиш ёки мумкин бўлган шартлар ишлаб чиқилмаган”, — деди у.
Песковнинг сўзларига кўра, Путин Россияга у ёки бу тарзда ўз мақсадларига эришишга ёрдам берадиган ҳар қандай алоқаларга очиқ.
“Тинч йўл билан музокаралар столида ўтиргани маъқул, аммо бунинг иложи бўлмаяпти”— деди Песков.
