Қашқадарёда 21 ёшли қизни беҳаё расмларини тарқатиш билан қўрқитган «куёв бола» аёл киши бўлиб чиқди
Ҳолат юзасидан аёл кишига нисбатан жиноят иши қўзғатилиб, 22 ёшли аёлнинг содир этилиб, фош этилмай қолган бошқа шу турдаги жиноятларга алоқадорлиги юзасидан суриштирув ишлари олиб борилмоқда.
ИИВ Киберхавфсизлик марказининг хабар беришича, Қашқадарёда 21 ёшли қизни беҳаё расмларини тарқатиш билан қўрқитган йигит аёл киши бўлиб чиқди.
Маълум қилинишича, Қашқадарё вилояти, Қарши туманида яшовчи 21 ёшли аёл ариза билан мурожаат қилиб, Telegramʼда «Фаррух-96» номли профиль эгаси, унинг турли беҳаё тасвирлари бўлган видеоларини ижтимоий тармоқлар орқали тарқатиб юбориш билан қўрқитиб, тарқатмаслик эвазига пул талаб қилаётганлигини билдирган.
Тезкор-қидирув хизмати Киберхавфсизлик бўлинмалари томонидан ўтказилган тезкор-қидирув тадбирлари натижасида мазкур жиноятни Қашқадарё вилояти, Ғузор туманида яшовчи 22 ёшли аёл содир этгани аниқланган.
Аниқланишича, у Telegramʼда ўзини Фаррух деб таништириб, жабрланувчини яхши кўриб қолгани ҳамда унга уйланиш мақсади борлигини айтиб, унинг ишончига кириш орқали унинг турли фотосуратлари ва беҳаё видеотасвирларини қўлга киритиб, ижтимоий тармоқларда тарқатиб юбориш билан қўрқитган.
Натижада тарқатмаслик эвазига гумонланувчи ўзининг банк карталарига жами 14 млн 300 минг сўм пулни ўтказиб олган ва ўз эҳтиёжлари йўлида ишлатиб юборган.
Ҳозирда мазкур ҳолат юзасидан Жиноят кодексининг 165-моддаси 1-қисми билан жиноят иши қўзғатилиб, 22 ёшли аёлнинг содир этилиб, фош этилмай қолган бошқа шу турдаги жиноятларга алоқадорлиги юзасидан тезкор-суриштирув ишлари олиб борилмоқда.
