Ўзбекистон футбол ассоциацияси бир қатор солиқлардан озод этилди
Ассоциация клублари ва унинг ҳудудий бўлинмалари 2026 йил 1 январгача солиқларни тўлашдан озод этилади
Президент томонидан имзоланган қонун билан Солиқ кодексининг 483-моддасига қўшимча киритилди.
Унга кўра, 2026 йил 1 январгача Ўзбекистон футбол ассоциацияси, унинг ҳудудий бўлинмалари, “Ўзбекистон Профессионал футбол лигаси” жамоат бирлашмаси, Ўзбекистон футбол ҳакамлари маркази ва профессионал футбол клублари қуйидаги солиқларни тўлашдан озод этилади:
-
барча турдаги солиқларни (бундан ижтимоий солиқ мустасно);
-
ўзи жалб қилган чет эл мутахассислари ва футболчиларининг даромадларидан тўланадиган жисмоний шахслардан олинадиган даромад солиғини;
-
Ўзбекистонга олиб кириладиган, Ўзбекистонда ўхшаши ишлаб чиқарилмайдиган спорт асбоб-ускуналари ва инвентари, трансляция қилиш учун зарур бўлган асбоб-ускуналар, инвентарь ва техника, фармакология товарлари, спорт озиқ-овқатлари, футбол (футзал) майдонлари учун сунъий ўтлар, шокпад, гранулалар, махсус елимлар ва махсус профессионал спорт кийим-бошлари, транспорт воситалари, шу жумладан махсус транспорт воситалари учун қўшилган қиймат солиғини.
Қайд этилишича, қонун расмий эълон қилинган кундан эътиборан кучга киради.
