Сурхондарёда ЙПХ инспекторларини тарвуз ўғирлашда асоссиз айблаган шахс қамалди
У тарвузлари камайгани учун ЙПХ ходимларини ўғирликда айблаган.
Аввалроқ ижтимоий тармоқларда Сурхондарё вилояти Қумқўрғон туманида ЙПХ инспекторлари тарвуз ўғирлагани айтилган видео тарқалганди.
Ҳолат юзасидан маълум қилинишича, воқеа «Боймоқли» маҳалласи ҳудудида хизмат олиб бораётган йўл патруль хизмати инспекторлари ҳамда ҳуқуқбузарлик содир этиб ИИО ходимларининг қонуний талабини бажаришдан бўйин товлаб, ўзининг танишлари билан ходимларга нисбатан қаршилик кўрсатаётган бир гуруҳ фуқаролар ўртасида содир бўлган.
Натижада ҳолатга алоқаси бўлмасада шу атрофда турганлардан бири ходимларни тасвирга олиб, ижтимоий тармоқларга тарқатилган.
«Бу кун» информацион дастурининг хабар беришича, айбланувчи Маъмурий жавобгарлик тўғрисидаги кодекснинг 195-моддаси 1-қисми билан айбли деб топилиб, унга нисбатан 5 сутка маъмурий қамоқ жазоси тайинланган.
