Британиялик аёл ишидан 260 минг доллар ўғирлади

Буюк Британияда 16 йил давомида молия бўлимида ишлаган Рейчел Уилсон эрининг гиёҳванд моддаларга бўлган қарамлигини молиялаштириш учун иш жойидан 260 минг АҚШ долларидан ортиқ маблағни ўғирлади. Бу ҳақда Daily Mail нашри хабар берди.

 

Уилсон компанияда бош ғазначи сифатида фаолият юритган ва шу лавозимидан фойдаланиб, сохта тўловлар ва қалбакилаштирилган чеклар орқали пул ўзлаштирган. Маблағларни у 2020 йил апрелидан бошлаб ўзлаштира бошлаган, аммо 2024 йил август ойида вақтинча унинг ўрнини босган ҳамкасби молиявий ҳисоботларда муаммоларни аниқлаганидан сўнг, жиноят фош этилган.

 

Ички тергов натижасида Рейчел ўз айбини тан олиб, полицияга тўлиқ кўрсатма берган. Судда у бу ишни умидсизликдан қилганини, эрининг гиёҳвандлик муаммоси уни шу йўлга бошлаганини тушунтирган. Унинг адвокати аёл илгари судланмаган, ҳашаматли ҳаёт кечирмаган ва руҳий саломатлиги билан боғлиқ муаммолар билан курашганини таъкидлаган.

 

Лекин Ливерпул Қироллик суди судьяси Марк Эйнсворт иш ҳажмини ва ишончни суиистеъмол қилганини инобатга олиб, аёлни икки йилга озодликдан маҳрум қилди. Суд Уилсоннинг ҳаракати нафақат компанияга, балки оиласига, айниқса болаларига катта зарар етказганини айтиб ўтди.