Қўшма декларация, ОАВ учун махсус баёнот ва байрамона концерт: Шавкат Мирзиёевнинг Мўғулистонга ташрифида нималар бўлди?

 

Давлат ташрифи билан Мўғулистонда бўлган Шавкат Мирзиёев булан Ухнаагийн Хурелсух ўртасида тор доирадаги ва расмий делегациялар иштирокидаги музокаралар бўлиб ўтди. Давлатимиз раҳбари Мўғулистон етакчисига самимий қабул ва расмий ташриф таклифи учун миннатдорлик билдирди.

 

Ташриф икки давлат ўртасидаги кўп қиррали алоқаларни ривожлантиришда янги босқични бошлаб берди. Мулоқот чоғида барча даражадаги алоқалар фаоллашгани, товар айирбошлаш ҳажми ортиб бораётгани, соғлиқни сақлаш, таълим, электрон савдо, қишлоқ хўжалиги ва қурилиш материаллари ишлаб чиқариш каби йўналишларда илк ҳамкорлик лойиҳалари амалга оширилаётгани таъкидланди. Улан-Баторда Ўзбекистон маҳсулотлари учун савдо уйи ҳам очилди.

 

 

 

Музокаралар давомида иқтисодий кооперацияни чуқурлаштириш, имтиёзли савдо ва инвестицияларни ҳимоя қилишга доир битимларни тезлаштириш, саноат, тоғ-кон, қишлоқ хўжалиги, транспорт, таълим ва экотуризм каби устувор йўналишлар бўйича янги ташаббуслар илгари сурилди. Шунингдек, Ўзбекистон Геология вазирлигининг ваколатхонаси Улан-Баторда очилгани мамнуният билан қайд этилди.

 

Учрашув асносида Президентлар кенг қамровли шериклик тўғрисидаги қўшма декларацияни ҳамда соғлиқни сақлаш, олий таълим, спорт, жиноятчиликка қарши курашиш, қишлоқ хўжалиги ва маданият соҳаларида ҳамкорликни назарда тутувчи ҳужжатларни имзоладилар. Ташқи ишлар ва савдо вазирликлари ўртасида 2026-2028 йиллар учун ҳамкорлик дастурлари ҳам тасдиқланди.

 

 

 

Давлат раҳбарлари шунингдек икки давлат ОАВ вакиллари учун учрашувда иштирок этиб, ўзаро дўстлик ва ҳамкорликнинг янги босқичи бошланганини таъкидладилар. Хусусан, Ўзбекистон Президенти Мўғулистон халқини Халқ инқилоби куни билан табриклаб, мамлакатда кечаётган ислоҳотлар, ижтимоий-иқтисодий ютуқлар ва халқаро нуфузнинг ошиб бораётганини эътироф этди.

 

 

 

Музокараларда Ўзбекистон-Мўғулистон иқтисодий ҳамкорлигини янги босқичга олиб чиқиш, транспорт боғлиқлигини мустаҳкамлаш, авиақатновларни йўлга қўйиш, олий таълим квоталарини кенгайтириш ва маданий алмашинувларни кучайтириш бўйича муҳим келишувларга эришилди.

 

Ташриф доирасида икки давлат раҳбарлари санъат усталари концерт дастурида ҳам иштирок этиб, халқларимиз дўстлигининг маданий ифодасига гувоҳ бўлдилар. Концерт Ўзбекистон-Мўғулистон алоқаларида янги давр бошланганининг рамзий ифодаси бўлди.