Россияда янги тартиб: чет элликлар учун SIM-карта чекловлари кучайтирилди
1 июлдан бошлаб хорижликлар учун мобил алоқа хизматлари босқичма-босқич чекланади.
Россия Рақамли ривожланиш вазирлигининг маълум қилишича, 2025 йил бошидан кучга кирган янги тартибга мувофиқ, чет эллик фуқаролар ягона биометрик тизим (ЭБС)да рўйхатдан ўтган тақдирдагина алоқа операторлари билан мобил алоқа бўйича шартнома тузишлари мумкин. 1 июлдан бошлаб эса бу талабни бажармаган хорижликлар учун мобил алоқа хизматлари босқичма-босқич чекланади.
Ушбу янги қоидалар асосида, 2024 йил 1 июлга қадар биометрик маълумотларини топширмаган чет элликларнинг фаол телефон рақамлари аввал халқаро ва шаҳарлараро қўнғироқлар, шунингдек интернет тезлигининг пасайтирилиши орқали чекланади. 30 кун ичида биометрик рўйхатдан ўтилмаса, уларнинг рақамлари тўлиқ блокланади. Узоқ вақт давомида (3 ойдан ортиқ) фаолсиз қолган рақамлар эса дарҳол ўчирилади.
Вазирлик маълумотларига кўра, ҳозиргача икки миллиондан ортиқ чет эл фуқаролари ЭБС тизимида рўйхатдан ўтган ва янги қоидаларга мувофиқ сим-карталар сотиб олган.
Бу чоралар, ҳукуматнинг тушунтиришича, Россияда ноқонуний “кулранг сим-карталар” савдосига чек қўйиш ва хавфсизликни ошириш мақсадида жорий этилган.
