Франция ва Буюк Британия ядровий кучларини бирлаштирмоқда
Икки давлат Европа хавфсизлигига таҳдид юзага келганда биргаликда жавоб беришга келишиб олди.
Франция президенти Эммануэл Макрон ва Буюк Британия бош вазири Кир Стармер тарихий декларацияни имзолади. Ушбу ҳужжат икки давлатнинг мустақил ядровий кучларини биринчи бор мувофиқлаштиришини расман эълон қилади. Бу Европа хавфсизлиги учун янги босқич бўлиб, ядровий сиёсатда ҳамкорликка эшик очади. Бу ҳақда The New York Times нашри хабар берган.
"Бугун эрталаб биз тегишли декларацияни имзоладик. Бу ҳужжат биринчи марта бизнинг мустақил ядровий тийиб турувчи кучларимизни мувофиқлаштиришимизни тасдиқлайди," — деди Стармер Париждаги матбуот анжуманида. "Агар қитъамиз хавф остида қолса, бу икки давлат томонидан биргаликда жавоб беришга олиб келади."
Экспертларнинг фикрича, бу келишув Россия ёки бошқа геосиёсий таҳдидларга қарши кучли сигнал бўлиб хизмат қилади. Айниқса, НАТО доирасидан ташқари икки ядровий давлат ўртасида бундай даражадаги стратегик мувофиқлик илк бор кузатилмоқда. Келишув Европанинг ядровий хавфсизлик тамойилларини қайта шакллантириши мумкин.
Франция ва Буюк Британия НАТО аъзоси бўлишига қарамай, ўз ядровий тарсеналларини мустақил бошқаради. Бу келишув уларга бир-бирининг стратегик ҳаракатларига тезроқ жавоб бериш имконини беради. Расмийларнинг қайд этишича, декларация Европа мудофаасини мустаҳкамлаш йўлидаги муҳим қадамдир.
