Учрашувда катта ютуқларга эришилди – Трамп
2,5 соат давом этган музокараларда “катта прогресс” ҳақида гапирилди, аммо ўт очишни тўхтатиш бўйича аниқ қарор қабул қилинмади.
15 август куни АҚШ президенти Доналд Трамп ва Россия президенти Владимир Путин 2,5 соатдан ортиқ давом этган учрашув ўтказди. Томонлар “муҳим ютуқларга эришилганини” таъкидлашди, бирок урушни тўхтатишга доир аниқ келишув эълон қилинмади.
Саммит якунида Путин матбуот анжуманида “келишув бор” дея ишора қилди, Трамп эса “катта прогресс” ҳақида гапирди. Шунга қарамай, томонлар Украина урушида ўт очишни тўхтатиш бўйича ҳеч қандай баёнот бермади. АҚШ президенти Зеленский билан алоқага чиқиб, натижалар ҳақида маълум қилишини айтди.
Путин учрашувдан сўнг Аляскадаги Форт Ричардсон Мемуориал қабристонда Иккинчи жаҳон уруши даврида ҳалок бўлган совет жангчиларига гул қўйди ва сўнг Москвага қайтди. Трамп эса Air Force One бортида Вашингтонга йўл олди. Матбуот анжуманида иккала раҳбар ҳам саволларга жавоб бермади.
Саммитдан олдин Трамп агар Путин урушни давом эттирса “қатъий оқибатлар” бўлишини огоҳлантирган эди, бирок учрашувдан сўнг бу ҳақда ҳеч нарса демади. Учрашув якунида эса Путин: “Кейинги сафар Москвада,” дея таклиф қилди. Трамп бунга “Бу қизиқарли таклиф, эҳтимол шундай бўлиши мумкин”, дея жавоб берди.
