Шавкат Мирзиёев АҚШ Президентининг махсус вакилини қабул қилди
Учрашувда Ўзбекистон ва АҚШ ўртасидаги ҳамкорликни янада кенгайтириш истиқболлари муҳокама қилинди.
Ўзбекистон Республикаси Президенти Шавкат Мирзиёев 28 август куни мамлакатимизга ташриф буюрган Америка Қўшма Штатлари Президентининг глобал шерикликлар бўйича махсус вакили Паоло Замполлинини қабул қилди.
Учрашув аввалида АҚШ вакили Президент Доналд Трампнинг самимий саломи ва Ўзбекистон мустақиллиги куни муносабати билан табрикларини етказди.
Мулоқот чоғида Ўзбекистон билан АҚШ ўртасидаги стратегик шерикликни янада ривожлантириш, сиёсий мулоқотни фаоллаштириш, парламентлараро алоқаларни мустаҳкамлаш масалалари атрофлича муҳокама қилинди. Шу билан бирга, хавфсизлик соҳасида, жумладан, терроризм, экстремизм ва ноқонуний миграцияга қарши курашиш борасидаги ҳамкорлик самарали ривожланаётгани таъкидланди.
Иқтисодий ҳамкорлик масалаларига алоҳида эътибор қаратилди. Ўзбекистоннинг АҚШ билан савдо ҳажми 2024 йилда 15 фоизга ошгани, қўшма инвестиция лойиҳаларининг умумий қиймати 11 миллиард доллардан ошгани қайд этилди. Жорий йил июн ойида бўлиб ўтган Тошкент инвестиция форумида АҚШнинг 100 дан ортиқ етакчи компаниялари қатнашгани алоҳида таъкидланди.
Минерал ресурсларни ўзлаштириш, авиация, электр техникаси, қишлоқ хўжалиги, рақамли технологиялар, молия, инновациялар, таълим ва бошқа устувор йўналишларда ҳамкорликни кенгайтириш учун катта имкониятлар мавжудлиги қайд этилди.
Шунингдек, “C5+1” минтақавий ҳамкорлик формати доирасидаги ҳамкорликни ривожлантириш муҳимлиги таъкидланди ва бўлажак қўшма тадбирлар режаси кўриб чиқилди.
