Фарғоналик журналист товламачиликда айбланиб, 4 йилга қамалди
Суд журналистни туҳмат, ҳақорат ва товламачилик қилиш, ҳокимият вакилига ёки фуқаролик бурчини бажараётган шахсга қаршилик кўрсатиш, ҳужжатлар, штамплар ва муҳрлар билан боғлиқ жиноятлар, шунингдек ёлғон ахборот тарқатишдa айбдор деб топди.
Бугун, 20 январь куни Фарғона вилояти Марғилон шаҳрида Марғилон шаҳар судининг ҳукми билан «Антикоррупция» ОАВ мухбири товламачиликда айбланиб 4 йил муддатга озодликдан маҳрум қилинди. Бу ҳақда Фарғона вилоят судлари матбуот хизмати хабар берди.
Суд Э.T. ни Жиноят кодексининг 139-моддаси (туҳмат) 3-қисми «г» банди, 140-моддаси (ҳақорат қилиш) 3-қисми «а» банди, 165-моддаси (товламачилик) 1-қисми, 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) 1-қисми, 227-моддаси (ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яшириш) 2-қисми «а» банди ва 244-6-моддаси (ёлғон ахборот тарқатиш) 1-қисмида назарда тутилган жиноятларни содир этганликда айбли деб топди.
“Э.T.гa Жиноят кодексининг 59,61-моддалари тартибида 3 йил 10 ой, Жиноят кодексининг 60,61-моддаларига асосан жазони ўташдан муддатидан илгари шартли озод қилинганлигини бекор қилган ҳолда 4 йил муддатга озодликдан маҳрум қилиш жазоси тайинланди”, — дейилади расмий ахборотда.
Хабарга кўра, тайинланган жазони қаттиқ тартибли колонияларида ўтаттирилиши белгиланди.
“Биринчи инстанция судининг ҳукми устидан тарафлар қонунда белгиланган тартиб ва муддатда Фарғона вилоят судининг жиноят ишлари бўйича судлов ҳайъатига апелляция/кассация тартибида шикоят бериш ва протест келтиришга ҳақлидир”, — дейилади Марғилон шаҳри суди хабарида.
Эслатиб ўтамиз, 16 январь куни Тошкент шаҳри ИИББ томонидан Taftish.uz сайти ходимлари товламачилик ва фирибгарликда гумонланиб ушланган эди.
