Жиззахда алкотестер орқали ҳайдовчилардан пул ундириб келган ЙПХ ходими қўлга олинди
Шунингдек ЙПХ ва ЙҲХБ ходимларининг жарима майдонидан автомашиналарни пора эвазига чиқариб бергани аниқланди.
Жиззах вилоятида ҳайдовчилардан ноқонуний равишда пул ундириб келган йўл-патруль хизмати ходими фош этилди. Бу ҳақда вилоят Ички ишлар бошқармаси матбуот хизмати маълум қилди.
Маълум бўлишича, ЙПХ инспектори алкотестер қурилмасидан фойдаланган ҳолда ҳайдовчиларни спиртли ичимлик истеъмол қилганига ишонтириб, улардан пора талаб қилиб келган. Хусусан, у Ғаллаорол туманида жойлашган ЙПХ масканида Ласетти русумли автомашинани тўхтатиб, ҳайдовчини алкотестер ёрдамида текширувдан ўтказган. Ҳайдовчи спиртли ичимлик истеъмол қилмаганини билдирганига қарамай, инспектор уни хизмат хонасига олиб кириб, ҳужжат расмийлаштирмаслик эвазига 1 миллион сўм талаб қилган.
Натижада ҳайдовчи инспектор кўрсатган банк пластик картасига 500 минг сўм ўтказиб берган. Текширувлар давомида мазкур ходим илгари ҳам шунга ўхшаш ҳолатларга қўл ургани аниқланган. У ҳайдовчиларга алкотестер сўнгги 72 соат давомида истеъмол қилинган спиртли ичимликни аниқлаб беришини айтиб, уларни чалғитган.
Тезкор тадбирлар жараёнида пора ўтказилган банк картаси эгаси Ғаллаорол тумани «Бахт» маҳалласида яшовчи, 1977 йилда туғилган шахс экани, у жарима майдонида ишлаши ҳамда ушбу ЙПХ инспектори билан алоқадорлиги аниқланган.
Шунингдек, вилоятда яна бир ҳолат қайд этилди. Йўл ҳаракати хавфсизлиги бошқармаси қидирув-суриштирув бўлинмаси катта инспектори ва ЙПХ инспектори муддати ўтган қарздорлиги сабаб жарима майдонига жойлаштирилган Гентра автомашинасини 1 миллион 300 минг сўм эвазига ноқонуний равишда чиқариб беришга кўмаклашгани маълум бўлди. Бунинг учун улар далолатнома ҳужжатларига қарздорлик ва тақиқлар йўқлиги ҳақида ёлғон маълумот киритиб, муҳр билан тасдиқлашган.
Бундан ташқари, 11 миллион сўмлик МИБ қарздорлиги ва 4,5 миллион сўмлик жарима сабаб жарима майдонида сақланаётган Нехиа автомашинаси ҳам 500 минг сўм эвазига чиқариб берилгани аниқланган.
Мазкур ҳолатлар юзасидан хизмат текшируви ўтказилиб, ҳужжатлар ҳуқуқий баҳо бериш учун прокуратура органларига юборилди. Прокуратура томонидан уч нафар ходимга нисбатан Жиноят кодексининг тегишли моддалари билан жиноят иши қўзғатилган.
