Форишда кучли ёмғирдан сўнг сел тошқини кузатилди
30 га яқин хонадонларнинг ҳовлиси ва томорқаларига сел сувлари кирган.
Жорий йилнинг 14 февраль куни соат 04:53 да Жиззах вилояти ҳудудидаги Фориш туманида қисқа муддатли кучли ёмғир ёғиши натижасида сел-сувлари оқими кузатилган. Бу ҳақда ФВВ матбуот хизмати хабар берди.
Дастлабки маълумотларга кўра, «Қизилқум» МФЙ, Қизилқум қишлоғи «Эрали» кўчасидаги тахминан 30 га яқин аҳоли хонадонларнинг ҳовлиси ва томорқаларига сел-сувлари кириши кузатилган.
Ҳодиса оқибатларини бартараф этиш мақсадида зарур техника ва куч-воситалар жалб этилди.
Ҳодиса натижасида вафот этганлар ва жароҳат олганлар қайд этилмади. Вазият ҳудудий фавқулодда хизматлар томонидан тўлиқ назоратга олинган.
