Ўзбекистон ва Тожикистон маданият арбоблари “Дўстлик” ордени билан тақдирланди
Мукофотларни икки давлат маданият вазирлари тантанали равишда топширди.
Ўзбекистон ва Тожикистон ўртасидаги маданий ҳамкорликни мустаҳкамлашга қўшган муносиб ҳиссаси учун икки мамлакатнинг бир гуруҳ маданият ва санъат соҳаси вакиллари давлат мукофотлари билан тақдирланди.
Ўзбекистон Президентининг тегишли фармонига мувофиқ, Тожикистон Республикасининг Сўғд вилоятидаги “Нури ниёгон” шашмақом ансамбли раҳбари Шуҳратжон Набиев Ўзбекистон Республикасининг “Дўстлик” ордени билан мукофотланди.
Шунингдек, Тожикистон Президентининг фармонига асосан, Ўзбекистондаги Тожик миллий маданий маркази раҳбари Гуландом Субҳонова Тожикистон Республикасининг “Дўстлик” ордени билан тақдирланди.
Давлат мукофотларини тантанали равишда Ўзбекистон маданият вазири Озодбек Назарбеков ҳамда Тожикистон маданият вазири Матлубахон Сатториён топширди.
Маълумот учун, 2024 йилда Тожикистонда ўтказилган “Ўзбекистон маданияти кунлари” доирасида ҳам икки мамлакатнинг бир гуруҳ маданият ва санъат арбоблари юксак фахрий унвонлар билан тақдирланган эди.
Такидлаш жоизки, Ўзбекистон Президенти Шавкат Мирзиёевнинг таклифига биноан Тожикистон Президенти Эмомали Раҳмон 26–27 март кунлари давлат ташрифи билан Ўзбекистонда бўлди. Ташриф доирасида олий даражадаги музокаралар ҳамда икки давлат етакчилари раислигида Олий давлатлараро кенгашнинг биринчи йиғилиши ўтказилди. Унда Ўзбекистон ва Тожикистон ўртасидаги дўстлик, яхши қўшничилик, стратегик шериклик ҳамда иттифоқчилик муносабатларини янада ривожлантириш масалалари муҳокама қилинди.
Айни кунларда мамлакатимизда “Тожикистон маданияти ва киноси кунлари” тадбирлари ҳам бўлиб ўтмоқда. Мазкур маданий тадбирлар 29 март кунига қадар давом этади.