Заргарлик билан шуғулланувчиларга ҚҚСнинг 80 фоизи қайтарилади
Мазкур тартиб 2028 йил 1 январгача амал қилади.
Ўзбекистонда заргарлик фаолияти билан шуғулланувчи тадбиркорлар учун қўшилган қиймат солиғининг (ҚҚС) бир қисмини қайтариш тартиби жорий этилди. Бу ҳақда “Ҳуқуқий ахборот” Тelegram-каналида маълум қилинди.
Вазирлар маҳкамасининг 9 апрелдаги қарори билан “Заргарлик фаолияти билан шуғулланувчи тадбиркорлик субъектларига бюджетга тўланган қўшилган қиймат солиғининг бир қисмини қайтариш ҳамда ҚҚС базасини аниқлаш тартиби тўғрисида”ги вақтинчалик низом тасдиқланди. Мазкур низом 2028 йил 1 январгача амал қилади.
Ҳужжатга кўра, заргарлик буюмларини ишлаб чиқариш ва (ёки) уларни чакана сотиш билан шуғулланувчи тадбиркорларга 2026 йил 1 январдан бошлаб тўланган ҚҚСнинг 80 фоизи республика бюджетидан қайтарилади.
Қайд этилишича, тадбиркорлар солиқ ҳисоботини топширгандан сўнг, бироқ уч ойдан кечиктирмасдан тўланган солиқнинг бир қисмини қайтариш учун мурожаат қилиш ҳуқуқига эга. Мурожаатлар автоматлаштирилган дастур орқали кўриб чиқилади.
Солиқнинг бир қисми қуйидаги шартлар тўлиқ бажарилганда автоматик равишда қайтарилади:
• ҳисобот даврида тақдим этилган солиқ ҳисоботига мувофиқ ҳисобланган солиқ ушбу ҳисобот даврининг 1-санасидан 20-санасига қадар бюджетга тўлиқ тўланганда;
• ҳисобот даврида солиқ даврида заргарлик буюмларини ўзида ишлаб чиқарилган ва (ёки) сотишдан (реализация) қилишдан умумий тушум товарларни (хизматларни) реализация қилишдан олган даромаднинг камида 80 фоизини ташкил қилганда;
• ҳисобварақ-фактураларда ёки назорат-касса техникаси чекларида реализация қилинган товарлар (хизматлар) номенклатураси ҳамда фаолиятнинг ўзига хос хусусиятларига ёки амалга ошириладиган турларига мувофиқ бўлган идентификация кодлари акс эттирилган қисмига нисбатан.
Юқоридаги шартлар бажарилмаган тақдирда, тадбиркорлик субъектларига тўланган солиқнинг бир қисмини қайтариш автоматик равишда рад этилади. Солиқ органи тўланган солиқнинг бир қисмини қайтаришни рад этиш тўғрисида хулоса берганда, бу ҳақида автоматлаштирилган дастур орқали бир иш куни ичида солиқ тўловчининг шахсий кабинетига солиқнинг бир қисмини қайтаришни рад этишнинг асослантирилган сабаблари кўрсатилган ҳолда хабарнома юборилади. Тадбиркорлик субъекти солиқ суммасини қайтаришни рад этиш тўғрисидаги хулоса юзасидан қонунчилик ҳужжатларида белгиланган тартибда юқори турувчи органга ёки судга шикоят қилишга ҳақли.
Шунингдек, заргарлик буюмларини ишлаб чиқарувчилар солиқ базасини заргарлик буюмлари ва ярим тайёр маҳсулотларни реализация қилиш нархи ҳамда улар таркибидаги қимматбаҳо металлар ва қимматбаҳо тошлар нархи ўртасидаги ижобий фарқдан келиб чиқиб аниқлайди.
Аввалроқ 111 та заргарлик корхоналарига 3,7 млрд сўм ҚҚС қайтарилгани ҳақида хабар берилганди.
