Можтабо Хоманаий оғир жароҳатлардан сўнг даволанишни давом эттирмоқда — Reuters
Манбалар унинг ақлий ҳолати барқарор эканини ва иш фаолиятини давом эттираётганини билдирган.
Reuters агентлиги хабарига кўра, Можтабо Хоманаий ҳаво ҳужуми оқибатида олган оғир жароҳатларидан сўнг соғайиш жараёнини давом эттирмоқда.
Манбаларга таяниб билдирилишича, у АҚШ ва Исроил ҳарбий амалиётларининг илк кунида Теҳрон марказида жойлашган уйига берилган зарба натижасида юз қисмидан жиддий шикастланган, шунингдек, иккала оёғидан ҳам оғир жароҳатлар олган.
Шу билан бирга, манбалар унинг ақлий ҳолати барқарор эканини таъкидламоқда. Хусусан, у юқори даражадаги расмийлар билан аудиоконференция шаклида учрашувлар ўтказиб, муҳим сиёсий қарорлар, жумладан АҚШ билан музокаралар бўйича жараёнларда иштирок этишда давом этмоқда.
Агентлик қайд этишича, бу маълумотлар сўнгги ҳафталардаги унинг соғлиғи ҳақидаги энг батафсил тафсилотларни ўз ичига олади. Бироқ, Reuters ушбу маълумотларни мустақил равишда тасдиқлай олмаган.
Аввалроқ The Times нашри Хоманаий ҳушидан кетгани ва Қум шаҳрида даволанаётгани ҳақида хабар берган эди. Ўз навбатида, Эрон расмийлари унинг аҳволи барқарор эканини ва давлат бошқарувида фаол иштирок этаётганини маълум қилган эди.
