Шавкат Мирзиёев Қосим-Жўмарт Тўқаевни Бухорода кутиб олди
Бугун Ўзбекистон ва Қозоғистон етакчилари икки томонлама музокара ўтказади.
Ўзбекистон Республикаси Президенти Шавкат Мирзиёевнинг таклифига биноан Қозоғистон Республикаси Президенти Қосим-Жўмарт Тўқаев амалий ташриф билан мамлакатга келди. Бу ҳақда Ўзбекистон Президенти матбуот хизмати хабар берди.
Маълум қилинишича, олий мартабали меҳмонни Бухоро халқаро аэропортида давлат раҳбари кутиб олди.
Миллий куй-қўшиқ ва рақслардан иборат тантанали кутиб олиш маросими бўлди. Икки мамлакатнинг давлат байроқлари кўтарилди ва фахрий қоровул саф тортди. Ҳарбий оркестр ижросида давлат мадҳиялари янгради.
Бугун етакчилар икки томонлама музокара ўтказади. Шунингдек, Бухоронинг тарихий обидаларини зиёрат қилиш, саноат корхоналари фаолияти билан танишиш ҳамда бошқа тадбирлар режалаштирилган.
