Тошкент аэропортида гиёҳванд модда олиб кирмоқчи бўлган хорижлик ушланди
У 6 килограммдан ортиқ гиёҳванд моддани юклари орасига яшириб олиб ўтмоқчи бўлган.
Тошкент халқаро аэропортида гиёҳвандлик воситаларини яширинча олиб ўтишга уринган йўловчи тўхтатиб қолинди. Бу ҳақда Божхона қўмитаси хабар берди.
Қайд этилишича, Бангкокдан учиб келган хорижлик йўловчилардан бирига тегишли қўл юки ва багажлари божхона назоратидан ўтказилганида, юклар орасида турли қадоқлар ичида 12 дона полиэтилен ўрам яширилгани аниқланган.
Белгиланган тартибда ва холислар иштирокида ушбу ўрамлар очиб кўрилганида, уларнинг ичидаги яшил рангдаги ўткир ҳидли модда Марказий божхона лабораторияси хулосасига кўра, 6.3 кг.дан зиёд оғирликдаги қуритилган марихуана эканлиги маълум бўлган.
Ҳолат юзасидан божхона органлари томонидан жиноят иши қўзғатилди.
Маълумотларга кўра, “Тошкент-Аэро” ИБК тезкор тузилмалари ва божхона постлари ходимлари томонидан жорий йилнинг дастлабки чорагида аниқланган 15 та ҳолатда салкам 30 килограмм оғирликдаги гиёҳвандлик воситаларининг, шу жумладан синтетик наркотикларнинг божхона чегаралари орқали ноқонуний равишда олиб ўтилиши ва ички ҳудуддаги яширин айланмасига чек қўйилган. Аниқланаётган гиёҳвандлик воситалари ўтган йилнинг шу даврига нисбатан 18 килограммга ошган.
