Тоқаев Қозоғистонга етиб боргач, Мирзиёевга мактуб йўллади

Ўзбекистон Президенти Шавкат Мирзиёев номига Қозоғистон Президенти Қасим-Жомарт Тоқаевдан мактуб келди. Бу ҳақда Президент матбуот котиби хабар берди.

 

Мактубда Қозоғистон етакчиси нафақат Марказий Осиё, балки бутун жаҳон цивилизацияси дурдонаси бўлган қадимий Бухоро шаҳрига амалий ташрифи чоғида кўрсатган алоҳида меҳмондўстлик ва самимият учун Шавкат Мирзиёевга чин дилдан миннатдорлик билдирган.

 

Бундан ташқари, Тоқаев Ўзбекистон бу бебаҳо бойликни асраб-авайлаб, бойитиб, буюк ўтмишни замонавий эҳтиёжлар билан уйғунлаштириб келаётгани уни ҳайратга солганини қайд этган. 

 

“Бухоронинг бугунги гўзал қиёфаси Сизнинг Янги Ўзбекистонни барпо этишга қаратилган оқилона ва бунёдкорона сиёсатингиз юксак самарадорлигининг яққол ифодасидир. Пухта ўйланган тадбирларга бой ташрифнинг ўзи, шубҳасиз, фойдали бўлди. Назаримда, Бухородаги бир кунлик музокаралар узоқ муддатли сиёсий самараси жиҳатидан расмий ташрифдан асло қолишмайди. Учрашувимиз Қозоғистон ва Ўзбекистон ўртасидаги кўп қиррали алоқаларни янада мустаҳкамлаш учун янги уфқларни очди, давлатлараро стратегик ҳамкорликни янги мазмун билан бойитишга хизмат қилади”, дейилади мактубда.

 

Тоқаев Остонага қайтгач, эришилган ва тасдиқланган келишувларни амалга ошириш, шунингдек, Ўзбекистоннинг турли соҳалардаги фойдали тажрибасини ҳисобга олиш бўйича аниқ топшириқлар берганини, “Тоза ҳаво” қўшма ташаббусига алоҳида эътибор қаратишини маълум қилган.

 

“Ишончим комилки, биз қўйган вазифаларнинг сифатли бажарилиши Қозоғистон – Ўзбекистон стратегик шериклиги ва иттифоқчилигини янги чўққиларга олиб чиқишга хизмат қилади. Қозоғистон учун катта маданий ва тарихий аҳамиятга эга бўлган архив материалларини тақдим этганингиз учун алоҳида миннатдорчилик билдираман. Бу ҳаракат Сизнинг бағрикенглигингиз ва қозоқ халқига бўлган илиқ муносабатингиз, қардош мамлакатларимиз тарихини муносиб эътироф этишингиздан далолат беради”, дея қайд этилган мактубда.

 

Мактуб сўнгида Қозоғистон президенти Шавкат Мирзиёевга ва оиласига чин қалбидан сиҳат-саломатлик ва бахт-саодат, Қозоғистоннинг абадий дўсти, иттифоқчиси ва стратегик шериги бўлган Янги Ўзбекистонни барпо этишда янги муваффақиятлар тилаган.