Қирғизистонда рус тилидаги қишлоқлар номи ўзгартирилади — Садир Жапаров
Мазкур жараённи 2027 йилгача якунлаш режалаштирилган.
Қирғизистон президенти Садйр Жапаров мамлакатдаги рус тилидаги қишлоқлар номларини қирғизчага ўзгартириш режалаштирилаётганини маълум қилди. Бу ҳақда у Ўш вилояти Олой тумани аҳолиси билан учрашувда айтиб ўтган.
Давлат раҳбарининг сўзларига кўра, мазкур ташаббус миллий ўзлик ва маданий меросни мустаҳкамлашга қаратилган бўлиб, жараённи 2027 йилгача якунлаш режалаштирилган.
“Ҳозир биз бутун республика бўйича қишлоқларнинг русча номларини ўзгартиришни режалаштирмоқдамиз. Келгуси йилда бу жараённи якунламоқчимиз”, — деган у.
Шу билан бирга, президент аҳоли пунктларига шахслар номини беришни тақиқлаш қарори қабул қилинганини ҳам қайд этган. Унинг фикрича, бу амалиёт кўпинча жамиятда бўлинишларга сабаб бўлади.
“Одамлар гуруҳларга ажралиб, кимнинг номи берилиши кераклиги устида баҳслашади. Бундай ҳолатларни кўп бор кўрганмиз”, — деди Жапаров.
Бироқ мазкур баёнот ортидан Россиянинг ТАСС ва РИА Новости агентликлари президент матбуот хизмати билан боғланганда, давлат раҳбари вакили Асқат Алагозов гап русча номларни ўзгартириш ҳақида эмас, балки айнан шахслар номини беришни тақиқлаш ҳақида кетганини билдирган.
Шу билан бирга, президент расмий сайтида ҳам рус тилидаги қишлоқ номларини оммавий ўзгартириш бўйича маълумот берилмаган. Аммо ижтимоий тармоқларда тарқалган видеоларда Жапаров бу масалага тўхталгани акс этган.
