Тошкент аэропортида спорт озуқаси сифатида қадоқланган наркотик моддалар аниқланди
Спорт озуқаси сифатида кўрсатилган қўшимчалар ичидан 350 минг доллар қийматдаги синтетик наркотик модда топилди.
Тошкент халқаро аэропортида божхона ходимлари томонидан синтетик гиёҳвандлик воситаларини биологик фаол қўшимча сифатида олиб киришга уринган қўшни давлат фуқароси қўлга олинди. Бу ҳақда Божхона қўмитаси матбуот котиби хабар берди.
Маълум қилинишича, йўловчи божхона назоратининг “яшил” йўлагидан ўтишга уринган вақтида унинг багажидаги спорт озуқаси сифатида тақдим этилган икки дона биологик фаол қўшимча қутиси божхоначилар эътиборини тортган.
Текширув давомида ушбу капсулалар асл кўринишидан фарқ қилиши аниқланган. Хусусан, ишлаб чиқарувчи маълумотларига кўра қутиларда 760 дона оқ рангли капсула бўлиши лозим бўлган бўлса, амалда уларнинг сони 920 тани ташкил этгани, капсулалар эса сариқ ва қизил рангларда экани маълум бўлган. Бу эса маҳсулотлар қўлбола тарзда қайта қадоқланганини кўрсатган.
Ўзбекистон Республикаси Божхона қўмитаси Марказий божхона лабораторияси хулосасига кўра, капсулалар таркибида “Альфа-ПВП” туридаги синтетик наркотик модда борлиги аниқланган. Ушбу гиёҳвандлик воситаларининг қора бозорида чакана нархи 350 минг доллларгача етиши қайд этилди.
"Тошкент-АЭРО" ИБК тезкор тузилмалари томонидан тезкор тадбир Юқоричирчиқ туманида давом эттирилиб, ушбу йўловчи кейинчалик "закладка" усулида тарқатиш учун мўлжалланган гиёҳвандлик воситасини яшириб кетган манзил-ҳавола ҳам топилган. Кўздан кечириш жараёнида яширин жойдан бир дона полиэтилен пакет топилиб, унинг ичида тахминан ярим килограмм оғирликдаги “гашиш” моддаси борлиги аниқланган.
Мазкур ҳолат юзасидан божхона органлари томонидан жиноят иши қўзғатилиб, тергов ҳаракатлари олиб борилмоқда.
