Ўзбекистонда Афғонистондан олиб келинган қарийб 9 кг гиёҳванд модда савдоси тўхтатилди
Қонунбузарлар мазкур гиёҳвандлик воситаларини Хоразм вилоятида сотмоқчи бўлган.
Хоразм вилоятида йирик миқдордаги гиёҳвандлик воситаларининг ноқонуний айланмасига чек қўйилди. Бу ҳақда ДХХ хабар берди.
Маълум қилинишича, биринчи ҳолатда Қўшкўпир туманида яшовчи, 1985 йилда туғилган ва аввал гиёҳвандлик воситалари савдоси билан боғлиқ жинояти учун судланган шахс Урганч тумани ҳудудида ҳаракатланаётган вақтида тўхтатилган. Холислар иштирокида ўтказилган текширув давомида унинг ёнидан 4 кг 407 грамм “опий” моддаси аниқланиб, процессуал тартибда расмийлаштириб олинган.
Иккинчи ҳолатда эса “Беруний–Урганч” йўналишида ҳаракатланаётган “Лаcетти” русумли автомобиль Урганч туманидаги “Чолиш” ЙПХ масканида тўхтатилиб, кўздан кечирилган. Натижада автомобилда кетаётган Қўшкўпир туманида яшовчи, 2002 йилда туғилган ва муқаддам наркожиноят содир этгани учун судланган шахсга тегишли 4 кг 541 грамм “опий” моддаси борлиги аниқланиб, ашёвий далил сифатида расмийлаштириб олинган.
Таъкидланишича, ҳар икки ҳолатда ҳам қонунбузарлар Афғонистондан контрабанда йўли билан олиб келинган гиёҳвандлик воситаларини Хоразм вилоятида сотиш орқали катта даромад олишни режалаштирган.
Мазкур ҳолатлар юзасидан уларга нисбатан Жиноят кодексининг 28, 246-моддаси 2-қисми ва 25, 273-моддаси 5-қисми билан жиноят ишлари қўзғатилиб, “қамоқ” эҳтиёт чораси қўлланган. Ҳозирда тергов ҳаракатлари олиб борилмоқда.
Мутасаддилар гиёҳвандлик воситалари савдосига қарши курашишда ҳар бир фуқаронинг фаол фуқаролик позицияси муҳим эканини таъкидлаб, бундай иллатларга бефарқлик оғир оқибатларга олиб келиши мумкинлигини эслатди.
