Сурхондарёда мансабдор пора билан ушланди
У бўшайдиган бино ва ер майдонини аукцион орқали сотиб олиб бериш учун пул талаб қилган.
Сурхондарё вилоятида мансабдор шахсга нисбатан жиноят иши қўзғатилди. Бу ҳақда ДХХ хабар берди.
Маълум қилинишича, Термиз шаҳар Ветеринария ва чорвачиликни ривожлантириш бўлими ходими хизмат мавқеидан фойдаланиб, фуқаронинг ишончига кирган. У бўлим яқин вақтда бошқа жойга кўчишини айтиб, бўшайдиган бино ва ер майдонини танишлари орқали аукциондa сотиб олиб бериш эвазига мансабдор шахс фуқародан 3000 АҚШ доллари талаб қилган.
Давлат хавфсизлик хизмати, Иқтисодий жиноятларга қарши курашиш департаменти ҳамда ички ишлар органлари ходимлари томонидан ўтказилган тезкор тадбирда у 2 минг АҚШ доллари ва 12 миллион сўм пул маблағини олаётган вақтида ашёвий далиллар билан ушланган.
Ҳозирда мазкур ҳолат юзасидан жиноят иши қўзғатилиб, тергов ҳаракатлари давом этмоқда.
