Ўрта Чирчиқда 4 киши ҳалок бўлган ёнғин юзасидан жиноят иши қўзғатилди

Тошкент вилоятининг Ўрта Чирчиқ туманида хонадонда содир бўлган ёнғин ва портлаш оқибатида 4 киши вафот этгани юзасидан жиноят иши қўзғатилди. Бу ҳақда Бош прокуратура матбуот хизмати раҳбари Ҳаёт Шамсутдинов Zamon.uzга маълум қилди.

 

Маълум қилинишича, 16 апрель куни соат тахминан 01:40 ларда Ўрта Чирчиқ тумани “Ўртаовул” маҳалласида жойлашган уйда ёнғин хавфсизлиги қоидалари бузилиши сабаб портлаш содир бўлган ва ёнғин келиб чиққан.

 

Фожиа оқибатида 30 ёшли эркак ҳамда унинг 6 ёшли ўғли, 3 ва 2 ёшли қизлари ҳодиса жойида ҳалок бўлган. Дастлабки маълумотларга кўра, улар куйиш жароҳатлари ва ис газидан заҳарланиш оқибатида вафот этган.

 

Шунингдек, эркакнинг 27 ёшли турмуш ўртоғи ва 54 ёшли онаси ёнғиндан қутулиш мақсадида деразадан сакраб тушган. Улар турли тан жароҳатлари билан Нурафшон шаҳри тиббиёт бирлашмасига ётқизилган.

 

Мазкур ҳолат юзасидан туман прокуратураси томонидан Жиноят кодексининг 259-моддаси (ёнғин хавфсизлиги қоидаларини бузиш) 2-қисми “а”, “б” бандлари билан жиноят иши қўзғатилиб, тергов ҳаракатларини олиб бориш учун Тошкент вилояти ИИББ ҳузуридаги тергов бошқармасига юборилган.

 

Воқеа жойидан суд экспертлари, криминалистика мутахассислари ҳамда фавқулодда вазиятлар бошқармаси ходимлари томонидан ёнғиндан шикастланган буюмлар, алюминий сим бўлаклари ва бошқа ашёвий далиллар олинган.

 

Бундан ташқари, ҳодиса юзасидан туман Фавқулодда вазиятлар бўлими, ҳудудий электр тармоқлари корхонаси ҳамда газ таъминоти бўлими ходимларининг хатти-ҳаракатлари бўйича хизмат текшируви тайинланган.