Тошкент аэропортида Туркияга бир қизни фоҳишаликка юбораётган аёл ушланди
У мақсадига эришиш учун жабрланувчига авиачипта олиб берган.
Тошкентда одам савдоси билан боғлиқ навбатдаги жиноят ҳолати аниқланиб, унинг олди олинди. Бу ҳақда ДХХ хабар берди.
Маълум қилинишича, Тошкент вилоятининг Янгийўл шаҳрида яшовчи, 1982 йилда туғилган аёл Чиноз туманида истиқомат қилувчи, 2000 йилда туғилган қизни хорижга олиб чиқиб, жинсий эксплуатация қилишни режалаштирган.
У жабрланувчига авиачипта харид қилиб берган ҳамда кейинчалик унинг ишлаб топадиган даромадининг ярмини доимий равишда бериб боришини талаб қилган.
Тезкор чоралар натижасида гумонланувчи аёл жабрланувчи билан бирга Тошкент халқаро аэропортидан Истанбул шаҳрига учиб кетмоқчи бўлган вақтида тўхтатиб қолинган.
Мазкур ҳолат юзасидан аёлга нисбатан Жиноят кодексининг 135-моддаси (одам савдоси) билан жиноят иши қўзғатилиб, ҳозирда тергов ҳаракатлари олиб борилмоқда.
Аввалроқ Фарғона вилоятида яшовчи аёл ҳам бир қизни алдов йўли билан Туркиянинг Измир шаҳрига юқори даромадли иш ваъда қилиб, фоҳишалик учун юборишни режалаштиргани ва қўлга олингани ҳақида хабар берилганди.
